Таза суу үчүн шаардык мэрия бир күндүк эмгек маянасын которот

Naryn-kg — Thu, 23 Feb 2012 07:12:48 +0000

Нарын шаарынын Батыш чөлкөмүндө жайгашкан Төш –Булак участогунда таза суу көп жылдардан бери маселе жаратып келген. Жаңырган жылдан баштап АРИС уюмунун жардамы менен төш-булактаыктарды таза суу менен камсыз кылууга 32 млн сом каралды. Бирок 3,2 млн сом өздүк салым болуш керек. Андыктан шаар мэри Баатырбек Жээналиев шаардагы мекеме ишканалардан өздүк салым үчүн жардам сурап, бир күндүк эмгек акысын которуп берүү демилгесин көтөрдү. Ошентип 3,2 млн сомдун 1,5 млн сомун шаардагы мекеме ишканалар чогултуп берүүгө аракет кылат, калган акчаны Төш-Булактын жашоочулары чогултуулары зарыл. Бул маалыматты Нарын шаардык мэрияснын басма сөз катчысы Айзат Мурзаканова билдирди.

Жумгалдык окуучулар күлүктүктөн күч сынашты

Naryn-kg — Thu, 23 Feb 2012 07:09:29 +0000

Жумгал районунун Байзак айылында райондогу онго чукул мектептин 10-11- классынын окуучулары катышкан жарыш боюнча күч сынашышты. 8 чакырым аралыктагы жарышта алдыңкы үч орунду төмөнкү окуучулар камсыз кылышты. Биринчи орунга Миң-Куш шаарчасынан келген Жусуп-Сары орто мектебинин окуучусу Доктурбеков Эламан, экинчи орунда Чаек айылынан Таттыбүбү Турсунбаева гимназиясынан Коңурбай уулу Тилек, үчүнчү орунга ушул элек мектеп гимназиянын окуучусу Бекболот уулу Дастан ээ болушту. Бул иш чара 23-февраль Ата -Мекенди коргоочулардын күнүнө арналды. Аны менен катар Байзак айылынын дене тарбия мугалими маркум Турганбек Жумалиевдин жаркын элесине арналды. Жөө күлүктөргө Т. Жумалиевдин үй-бүлөөсү демөөрчүлүк кылса, мелдешти аталган айылдын “Дордой-Байзак” спорт мектебинин директору Качыбек Жээнкадыров уюштурган. Кошумчалай кетчү нерсе 23-февралда Көк-Ой айылынын жаштар кеңешинин демилгеси улак тартыш болсо, 25-февралда Ак-Татыр айылында ордо оюну боюнча мелдеш өтөт. Мындай багыттагы улуттук оюндар Жумгалда “Нооруз” майрамына чейин уланат. Бул маалыматтар кесиптешибиз М. Асаналиевден алынды.

Айрым жумгалдыктар “Көмүр” мамлекеттик ишканасын жоюу сунушун колдошо тургандыгын билдиришти

Naryn-kg — Thu, 23 Feb 2012 07:04:09 +0000

22-февралда Жумгал районунун борбору Чаек айылында кара алтын казуучу 9 ишкананын, бей өкмөт уюмдардын өкүлдөрү, район, айыл жетекчилери катышкан тегерек стол болуп өттү. Иш чараны уюштурган “Кара -Кече коргоо комитети” коомдук бирикмеси райондогу жалпы эле көмүр казуучуларга экологиялык нормаларды сактоо, казылган жерлерди кайра калыбына келтирүү сыяктуу эскертүүлөрдү беришти. Акыркы учурда мамлекеттик ишканалар “Көмүр” менен “Кара- Кече” ишканасын кошуп, бир эле мамлекеттик “Кыргыз көмүр” ишканасын уюштуруу боюнча өкмөттүн сунушун талкуулашты. Жыйынга катышкан жумгалдыктар “Көмүр” ишканасын жоюп эле, “Кара- Кечени” калтырууну колдошот. Алардын пикиринде “Көмүр” ишканасы катталган жери, төлөгөн төлөмдөрү Бишкек, Ош шаарларында болгондуктан, жумгалдыктардын жаратылышы , жайлоосу бузулгандан башка пайдасы жок дешти.

Ак куусунан айрылган Ак-Талаа

Naryn-kg — Wed, 22 Feb 2012 12:37:52 +0000

Облустун Ак-Талаа районунун Үгүт айыл округуна караштуу Үч-Кара-Суу участогуна 2008-жылы эки ак куу келип байырлап турган. Бирок аны аталган айылдын тургундары бирөөсүн атып салгандыктан экинчиси ал сууга боюн таштап өлүп калган. Бул тууралуу маалыматты Ак-Талаа райондук мамлекеттик администрациясынын экономиканы өнүктүрүү жана инвестиция тартуу бөлүмүнүн башкы адиси Табылды Байбагышов билдирди. Ак кууну аткан айылдыктарга райондук ички иштер бөлүмү тарабынан иликтөө жүргүзүлүп айып салынган. Ошондон кийин бул аймакка келген канаттууларды коргоо максатында Глобалдык экологиялык фонду жана Нарын мамлекеттик университетинин колдоосу менен долбоор жазылып Үч-Кара-Суусунун айланасы толук корулган. Мындан сырткары ишкер топтору түзүлүп пристан курулуп, кайык, дүрбү атайын кийимдер алынып берилген жана алар көлмөнүн айланасын камыштардан тазалап турушат. Учурда аталган көлмөдө өрдөк, чайка сыяктуу канатуулардын онго чукул түрү келип кетип байырлап турат.

Нарында күнөскана (теплица) курулат

Naryn-kg — Wed, 22 Feb 2012 12:28:01 +0000

Мындай маалыматты Ага Хан корунун алдында ачылаган “Кыргызcтандын тоолу аймактарындагы жамаатардын өнүгүүсүн колдоо” коомдук фондунун Нарын филиалынын жетекчиси Мелис Бердибеков билдирди. Белгилүү болгондой Европа Союзу менен Ага Хан корунун колдоосу менен ушул жылдын январь айынан баштап долбоор ырасмий ишке киришкен. 14 айга созулган долбоордун алкагында облустагы Кочкор , Нарын, Ат-Башы районудагы 350 гө чукул дыйкандар жашылча жемиштерди күнөсканаларда өстүрүүгө, аракет кылышат. Өстүрүлгөн жашылча жемиштер Нарындын базарларында сатылып, Нарын шаарында кайра иштетилет. Күнөсканалар болсо Кытайдын Кызыл Суу кыргыз автономиялуу облусуна атайын адистер барып, көрүп келгенден кийин орнотулат Анын курулуш материалдары да Кытай мамлекетинен алынып келинет. Долбоордогу негизги өнөктөш Айылдык кеңеш берүү (АКӨК) кызматы. Алар дыйкандарды тандап, тренингдерди өткөрөт.

Социалдык адилеттүүлүк күнүнө карата бир айлык жарыяланды

Naryn-kg — Wed, 22 Feb 2012 10:11:11 +0000

Социалдык адилеттүүлүктүн бүткүл дүйнөлүк күнүнө карата калктын социалдык аялуу катмарына колдоо көрсөтүү жана 20-мартка чейин иш чараларды өткөрүү максатында облустук администрациянын буйругу чыкты. Ага ылайык бир айлыктын алкагында аз камсыз болгон үй-бүлөлөргө, улгайган жарандарга, мүмкүнчүлүгү чектелгендерге акысыз медициналык жардамдар жана юридикалык кызматтар көрсөтүлөт. Ошондой эле социалдык колдоого муктаждарга материалдык жардам көрсөтүү багытында акциялар уюштурулат. Мындан сырткары жеке менчик ишканаларда, соода түйүндөрүндө жумушчулар менен түзүлгөн келишимдердин сакталышына мониторинг жүргүзүлүп кеңештер берилип, “Укугуңду билесинби” темасында ачык эшиктер күнү өткөрүлөт.

Нарында туризимди өнүктүрүүгө арналган семинар өтүп жатат

Naryn-kg — Wed, 22 Feb 2012 09:29:34 +0000

Нарын облусунда туризимди өнүктүрүүнүн мүмкүнчүлүктөрү тууралуу үч күндүк үйрөтмө окуу башталды. Ага облустун баардык дубандарындагы администрациялардын туризимди өнүктүрүү жана инвестиция тартуу бөлүмдөрүнүн башкы адистери, СВТ туристик тармагынын координаторлору катышып жатышат. Алгач райондордон келген өкүлдөр ар бир райондогу туризим багытындагы аткарылып жаткан иштерге токтолушуп, аны өнүктүрүүнүн жолдору жана кемчиликтери тууралуу маалыматтарды беришти. Алардын маалыматарына ылайык жалпы жонунан облуста туризимди өнүктүрүүдө маркетингдик изилдөөнүн жоктугу, маалыматтардын жетишсиздиги, кадырлардын тартыштыгы, инфраструктуранын начардыгы менен инвестициянын жетишсиздиги тоскоолдуктарды жаратып жаткандыгын баса белгилешти. Ошондой эле облуста тоо лыжа базасын куруу, ат турларына басым жасоо, кымыз менен дарылоо санаторийин ачуу, кыргыз колоритинде жасалгаланган конок үйлөрдүн санын көбөйтүү, ат оюндарын жана ар кандай фестивальдарды уюштуруу менен туризимди өнүктүрүүгө болот деген сунуш пикирлерди айтышты.

Акимдин орун басары жумуштан кетти

Naryn-kg — Tue, 21 Feb 2012 12:34:09 +0000

Жумгал районунун үч ай мурда бекиген акимдин орун басары Рысбек Кудайбергенов, өз каалоосу менен жумуштан кете тургандыгын билдирген.. Бизге жеткен маалымат боюнча андай арызды Р. Кудайбергенов кечээ 20-февралда жазган. Бул кабарды бүгүн Жумгал районунун акими Адылгазы Исагулов “naryn.kg” ге телефон аркылуу тастыктады.”Р. Кудайбергенов кызматтан өз ыктыяры менен кетүү боюнча өкмөт башчысы Ө. Бабановго арыз жазганы чындык”,-деди аким А. Исагулов.

Эске сала кетсек акимдин орун басары Р. Кудайбергенов “иштегенин сындасам мени сабады”,- деп аталган райондун депутаты Барчынбек Орозобеков маалымат берген. Жабыркаган Б. Орозобеков бул иш боюнча укук коргоо кызматкерлерине арыз жазган, өзү ооруканада дарыланууга аргасыз болгон. А бирок Р. Кудайбергенов ал дооматты четке каккан.

Турак-жай курууга 300 гө чукул жарандар катарда турат

Naryn-kg — Tue, 21 Feb 2012 11:14:08 +0000

Нарын шаарында турак жай куруу үчүн жер тилкесин сурап 300 чукул жарандар катарда турат. Бул тууралуу маалыматты Нарын шаарынын жана архитектура шаар курулуш башкармалыгынын жетекчиси Уланбек Калманбетов “naryn.kg”. Маалыматта айтылгандай шаардын РТС чөлкөмүнөн 350, батыш чөлкөмүндө 60 сотых жер участогу бар. Учурда кезекте тургандарга беш сотыхтан жер тилкеси берилип жатат.

“Тянь-Шандын байыркы эстеликтери” китебинин бет ачаар аземи өтөт

Naryn-kg — Tue, 21 Feb 2012 04:00:09 +0000

Борбордук Азия Университетинин Профессионалдык жана Үзгүлтүксүз билим берүү мектебинин билдирүүсү боюнча азем 28-февралда өтмөкчү. Иш чарада тарыхчы жана археолог Кубат Табалдиев Нарын областындагы жыйырма жылдык археологиялык изилдөөсүнүн жыйынтыктарына негизделген китебин тартууламакчы. Китеп таш доорунан коло кылымына чейинки мезгилди, алгачкы темир кылымын, орто кылымдарын жана тарыхый эралардын баалуу мурасынын күбөлүктөрүн камтыйт. Бул эмгеги менен автор Нарын аймагындагы негизги тарыхый объектилерди сактоонун маанилүүлүгү тууралуу коомчулуктун маалымдалышын көздөйт. Аземдин соңунда китептер сатылмакчы.